رسالپور میں پی اے ایف اکیڈمی اصغر خان کی پاسنگ آؤٹ پریڈ کے موقع پر خطاب کرتے ہوئے ایئر چیف مارشل ظہیر احمد بابر سدھو نے کہا کہ اگر ہماری قومی خودمختاری کو دوبارہ چیلنج کیا گیا تو دشمن پاک فضائیہ کو پہلے سے زیادہ مضبوط اور بہتر تیار پائے گا۔
انہوں نے کہا کہ پی اے ایف اکیڈمی میں سعودی کیڈٹس کی موجودگی دونوں ممالک اور ان کی مسلح افواج کے درمیان مضبوط دوستی اور تعاون کی علامت ہے۔ کیڈٹس کو مادرِ وطن کی فضائی سرحدوں کے دفاع کے مقدس مقصد کا امین بنایا گیا ہے، اور پوری قوم کی امیدیں ان کے کندھوں پر ہیں۔
سربراہ پاک فضائیہ نے کہا کہ قوم اور پاکستان کی مسلح افواج نے اتحاد کی شاندار مثال پیش کی، جس سے دشمن کو اس کی عددی برتری کے باوجود شکست کا سامنا کرنا پڑا۔ انہوں نے معرکۂ حق میں حاصل ہونے والی کامیابی کو قومی طاقت کے تمام عناصر کے متحدہ کردار اور اللہ کی رحمتوں کا نتیجہ قرار دیا۔
انہوں نے مزید کہا کہ پاک فضائیہ نے کم تعداد میں لڑنے کی روایت برقرار رکھتے ہوئے دشمن کے جدید طیارے مار گرائے، اور تمام آپریشنز مؤثر اور متوازن تھے۔ دنیا نے اس سے قبل فضائی طاقت کے اتنے جرات مندانہ استعمال کو نہیں دیکھا، جو جدید ٹیکنالوجیز کے ساتھ مربوط تھا۔ 2025 میں پاک فضائیہ نے اپنی پیشہ ورانہ مہارت اور تمام شعبوں میں برتری کو ثابت کیا۔
ایئر چیف مارشل نے کہا کہ پاک فضائیہ نے جدت طرازی اور اسمارٹ انڈکشن پروگرام کے ذریعے جدید لڑاکا طیارے اور ٹیکنالوجیز ریکارڈ وقت میں شامل کیں۔ ہر فرد کی پیشہ ورانہ محنت اور مشکل حالات میں عزم قابلِ تحسین ہے، اور افواج کے ساتھ مل کر وطن کا دفاع بہادری اور ہم آہنگی سے کیا گیا۔
انہوں نے واضح کیا کہ پاکستان ایک پرامن ملک ہے اور دوستانہ تعلقات قائم رکھنا چاہتا ہے، مگر قومی خودمختاری کے چیلنج کی صورت میں دشمن کو مضبوط پاک فضائیہ کا سامنا کرنا ہوگا۔
پی اے ایف اکیڈمی رسالپور سے آج مجموعی طور پر 166 کیڈٹس پاس آؤٹ ہوئے، جن میں 136 پاک فضائیہ اور 20 سعودی فضائیہ کے کیڈٹس شامل ہیں۔ تقریب میں پاک فضائیہ کے لڑاکا طیارے اور شیر دل ایروبیٹکس ٹیم کا فلائے پاسٹ بھی دکھایا گیا۔
