راولپنڈی میں اڈیالہ جیل کے باہر میڈیا سے گفتگو کرتے ہوئے پاکستان تحریک انصاف کے چیئرمین بیرسٹر گوہر علی خان نے کہا کہ ہم جس جانب بھی کھڑے ہیں، سب کچھ بانی کے لیے ہی کر رہے ہیں۔ ان کا کہنا تھا کہ سیاسی مسائل کا حل سیاسی طریقے سے ہی ممکن ہے۔
انہوں نے بتایا کہ بانی پی ٹی آئی کی ایک بہن کو ملاقات کی اجازت مل گئی ہے، جو خوش آئند بات ہے۔ بانی پی ٹی آئی سابق وزیر اعظم ہیں، ان کا حق ہے کہ انہیں اہل خانہ سے ملنے دیا جائے۔ بچوں سے بات چیت ہونا بھی مثبت پیش رفت ہے اور حالات کو اب بہتری کی جانب بڑھنا چاہیے۔
بیرسٹر گوہر نے کہا کہ ہر مسئلے کو طاقت کے استعمال سے حل نہیں کیا جا سکتا۔ انہوں نے واضح کیا کہ گزشتہ ہفتے دھرنے کے دوران ان کے خلاف کوئی نعرے بازی نہیں ہوئی۔
گورنر راج کی خبروں سے متعلق سوال پر بیرسٹر گوہر علی خان نے کہا کہ یہ محض چہ میگوئیاں ہیں اور حقیقت سے دور ہیں۔ ان کے مطابق صوبہ گورنر راج کا متحمل نہیں ہو سکتا اور صوبہ آئین و قانون کے مطابق ہی چلے گا۔
