الیکشن کمیشن آف پاکستان نے بیرسٹر گوہر کو چیئرمین پاکستان تحریک انصاف تسلیم کرنے سے انکار کرتے ہوئے ان کی جانب سے آزاد سینیٹرز کی پی ٹی آئی میں شمولیت کی درخواست بھی مسترد کر دی۔
بیرسٹر گوہر نے الیکشن کمیشن کو خط لکھ کر مؤقف اختیار کیا تھا کہ آزاد حیثیت میں منتخب سینیٹرز کو پاکستان تحریک انصاف میں شامل کرنے کی منظوری دی جائے۔
تاہم الیکشن کمیشن نے اپنے جوابی خط میں واضح کیا کہ بیرسٹر گوہر کو نہ تو آزاد سینیٹرز کو پارٹی میں شامل کرانے کا کوئی قانونی اختیار حاصل ہے اور نہ ہی کمیشن انہیں چیئرمین پی ٹی آئی کے طور پر تسلیم کرتا ہے۔
جوابی خط میں کہا گیا کہ چونکہ پی ٹی آئی کا انٹرا پارٹی الیکشن کیس زیرِ التوا ہے اور پارٹی نے خود لاہور ہائیکورٹ سے اسٹے آرڈر لے رکھا ہے، اس لیے کسی بھی شخص کو پارٹی چیئرمین کی حیثیت دینا ممکن نہیں۔
دوسری جانب بیرسٹر گوہر نے الیکشن کمیشن کا جواب موصول ہونے کی تصدیق کر دی ہے اور کہا ہے کہ معاملہ عدالت میں لے کر جائیں گے۔ ان کا کہنا تھا کہ نہ الیکشن کمیشن نے ہمارے انٹرا پارٹی الیکشن کو تسلیم کیا اور نہ ہی سرٹیفکیٹ جاری کیا، اس لیے قانونی راستہ اختیار کیا جائے گا۔
