پنجاب میں سالٹ رینج کے پہاڑی سلسلے میں تیتر کے شکار کے لیے سرکاری پرمٹس کی باضابطہ نیلامی کی گئی ہے، جس میں سب سے مہنگا پرمٹ تین لاکھ روپے میں فروخت ہوا۔
محکمہ وائلڈلائف نے چکوال، جہلم اور اطراف کے علاقوں کو زونز اور کمیونٹی بیسڈ کنزروینسیز میں تقسیم کیا ہے، جہاں شکار کے اجازت نامے صرف نیلامی کے ذریعے جاری ہوں گے۔ ہر زون میں اوسطاً نو پرمٹس دیے جائیں گے اور ہر پرمٹ پر تین رائفلوں سے زیادہ سے زیادہ چھ تیتر شکار کیے جا سکتے ہیں۔
نیلامی سے حاصل شدہ آمدن کا 80 فیصد براہِ راست مقامی کمیونٹیز کو دیا جائے گا تاکہ افزائش نسل اور غیر قانونی شکار کی روک تھام کو فروغ دیا جا سکے۔ پالیسی کے مطابق شکار صرف اس زون میں اور ایک بار ہی کیا جا سکتا ہے۔
یہ اقدام مقامی کمیونٹیز کو تحفظاتی منصوبوں کا حصہ بنا کر پائیدار وائلڈلائف مینجمنٹ کے فروغ کے لیے کیا گیا ہے۔
