بھارتی ریاست مہاراشٹرا کے سابق وزیر اعلیٰ اور کانگریس کے سینئر رہنما پرتھوی راج چوہان نے اعتراف کیا ہے کہ بھارت کو آپریشن سندور کے پہلے ہی دن فضائی محاذ پر مکمل شکست کا سامنا کرنا پڑا تھا۔
پریس کانفرنس سے خطاب کرتے ہوئے پرتھوی راج چوہان نے کہا کہ 7 مئی کو صرف آدھے گھنٹے کی فضائی جھڑپ میں بھارتی فضائیہ کے جنگی طیارے مار گرائے گئے، جس کے بعد پاکستانی فضائیہ کے ممکنہ حملوں کے خدشے کے پیش نظر بھارتی ائیر فورس کے طیاروں کو مزید پروازوں سے روک دیا گیا۔
سابق وزیراعلیٰ کے مطابق اس ناکامی کو چھپانے کے لیے بعد ازاں ’آپریشن مہادیو‘ کے نام سے جعلی مقابلے شروع کیے گئے تاکہ آپریشن سندور کی ناکامی پر پردہ ڈالا جا سکے۔
پرتھوی راج چوہان نے اپنے مؤقف پر قائم رہنے کا اعلان کرتے ہوئے معافی مانگنے سے انکار کر دیا۔ ان کے اس بیان کے بعد بھارت میں سیاسی حلقوں میں شدید ہلچل مچ گئی ہے اور حکومت کو سخت تنقید کا سامنا ہے۔
