گڈز ٹرانسپورٹرز اور حکومت کے درمیان مذاکرات کامیاب ہو گئے ہیں، جس کے بعد 10 روز سے جاری ہڑتال فوری طور پر ختم کرنے کا اعلان کر دیا گیا ہے۔
گڈز ٹرانسپورٹرز ایسوسی ایشن کے ترجمان کے مطابق حکومت نے ٹرانسپورٹرز کے بیشتر مطالبات تسلیم کر لیے ہیں، جس کے بعد فیصلہ کیا گیا ہے کہ رات ہی سے مال بردار گاڑیاں سڑکوں پر آنا شروع ہو جائیں گی۔
ترجمان نے بتایا کہ گڈز ٹرانسپورٹرز نے حکومت سے ٹرانسپورٹ ایکٹ میں ترمیم، ڈرائیورز اور مالکان کے خلاف درج ایف آئی آرز اور جرمانے واپس لینے، بندرگاہوں پر ایک ہزار کنٹینرز کے لیے جگہ فراہم کرنے اور پاک افغان سرحد پر پھنسی گاڑیاں نکالنے کا مطالبہ کیا تھا۔
اس کے علاوہ ایسوسی ایشن کی جانب سے ایل ٹی وی اور ایچ ٹی وی ڈرائیونگ لائسنس کے اجرا کے لیے ہائی ویز اور موٹرویز پر موبائل یونٹس قائم کرنے کا مطالبہ بھی کیا گیا تھا۔
ترجمان کے مطابق مذاکرات کے بعد ان مطالبات پر پیش رفت ہوئی ہے، جس کے نتیجے میں ہڑتال ختم کرنے کا فیصلہ کیا گیا۔
