اسلام آباد: دفتر خارجہ نے کہا ہے کہ پاکستان یمن میں امن و استحکام کے لیے جاری کوششوں کی مکمل حمایت کرتا ہے اور موجودہ صورتحال پر گہری نظر رکھے ہوئے ہے۔ ترجمان دفتر خارجہ نے بتایا کہ پاکستان سعودی عرب کی قیادت میں یمن میں امن قائم کرنے کی سفارتی کوششوں کو سراہتا ہے اور امید کرتا ہے کہ یہ اقدامات ملک میں دیرپا امن کے قیام کا سبب بنیں گے۔
ترجمان نے متحدہ عرب امارات کی جانب سے یمن کے استحکام کے لیے کی جانے والی کوششوں کو بھی سراہا اور زور دیا کہ یمن کی علاقائی سالمیت کا احترام ضروری ہے۔ وزارت خارجہ نے فریقین سے اپیل کی کہ وہ کسی بھی یکطرفہ اقدام سے گریز کریں جو کشیدگی بڑھا سکتا ہے اور متفقہ مذاکرات کے ذریعے سیاسی حل تلاش کریں۔
یمن کے مستعفی صدر منصور ہادی اور جنوبی یمن میں عبوری کونسل کے مسلح گروہوں کے درمیان کشیدگی جاری ہے اور جھڑپیں مختلف علاقوں میں بڑھتی رہتی ہیں۔ ان جھڑپوں کا آغاز عدن سے ہوا اور بعد ازاں جزیرہ سقطری اور دیگر علاقوں تک پھیل گیا، جس کے دوران سینکڑوں افراد ہلاک یا زخمی ہوئے۔
پاکستان یمن میں جاری بحران کے حل کے لیے علاقائی اور عالمی سطح پر سفارتی اقدامات کی حمایت جاری رکھے گا اور خطے میں دیرپا امن و استحکام کے قیام کے لیے مثبت کردار ادا کرے گا۔
