اسلام آباد: عمران خان میڈیکل بورڈ تشکیل دینے کا حکومت نے اہم فیصلہ کر لیا ہے۔ سابق وزیراعظم عمران خان کی صحت اور علاج کے پیش نظر انہیں اسپتال منتقل کرنے اور میڈیکل بورڈ بنانے کی منظوری دے دی گئی ہے۔
وفاقی وزیر برائے پارلیمانی امور اور مسلم لیگ (ن) کے سینئر رہنما طارق فضل چوہدری نے سماجی رابطے کی ویب سائٹ ایکس پر اپنے بیان میں کہا کہ عمران خان کو ان کے بیٹوں سے فون پر بات کرنے کی سہولت بھی فراہم کر دی گئی ہے جبکہ ان کی طبی حالت کو مدنظر رکھتے ہوئے عمران خان میڈیکل بورڈ تشکیل دینے کا فیصلہ کیا گیا ہے تاکہ مکمل اور شفاف طبی معائنہ یقینی بنایا جا سکے۔
انہوں نے کہا کہ حکومت انسانی ہمدردی اور قانونی تقاضوں کو مقدم رکھتی ہے اور ہر قیدی کو قانون کے مطابق سہولیات فراہم کرنا ریاست کی ذمہ داری ہے۔
طارق فضل چوہدری کا کہنا تھا کہ صحت جیسے حساس معاملے پر سیاست نہیں ہونی چاہیے اور سیاسی پوائنٹ اسکورنگ یا بے بنیاد پروپیگنڈے سے گریز کیا جانا چاہیے۔ انہوں نے مزید کہا کہ حکومت اپنی ذمہ داریاں پوری کر رہی ہے اور اس معاملے پر قومی سنجیدگی اور برداشت کا مظاہرہ کرنا ضروری ہے۔
