وزیراعلیٰ پنجاب مریم نواز نے کہا ہے کہ اسلام میں خواتین کے حقوق سے متعلق واضح احکامات موجود ہیں اور خواتین کو بااختیار بنانا کسی ایک طبقے نہیں بلکہ پوری قوم کی ترقی کا ضامن ہے۔
اسلام آباد میں اسلامی تعاون تنظیم کی خواتین سے متعلق نویں وزارتی کانفرنس سے خطاب کرتے ہوئے مریم نواز نے کہا کہ پاکستان میں خواتین کی مالی شمولیت، کاروباری مواقع اور آئی ٹی مہارتوں کے فروغ کے لیے عملی اقدامات کیے جا رہے ہیں۔ ان کا کہنا تھا کہ تعلیم، صحت اور روزگار خواتین کے بنیادی حقوق ہیں، جبکہ انہیں بہتر طبی سہولیات کی فراہمی پر بھی خصوصی توجہ دی جا رہی ہے۔
وزیراعلیٰ پنجاب نے کہا کہ خواتین کو محفوظ اور مساوی مواقع فراہم کرنا حکومت کی ترجیح ہے، طالبات کو اسکالرشپس اور لیپ ٹاپ دیے جا رہے ہیں، جبکہ خواتین کو درپیش مسائل کے حل کے لیے مشترکہ اور مؤثر اقدامات وقت کی اہم ضرورت ہیں۔
