کراچی میں سندھ کے سینئر وزیر شرجیل انعام میمن نے کہا ہے کہ ریڈ لائن بی آر ٹی منصوبے کو تیزی سے مکمل کرنے کے لیے حکومت سندھ دن رات کام کر رہی ہے اور منصوبے کو درپیش مسائل کے حل کے لیے عملی اقدامات کیے جا چکے ہیں۔
شرجیل میمن سے ایشین ڈیولپمنٹ بینک کے کنٹری ڈائریکٹر ایما فین کی قیادت میں وفد نے ملاقات کی جس میں وفد کو ریڈ لائن بی آر ٹی کے مختلف مراحل، تعمیراتی رفتار اور تکنیکی امور پر تفصیلی بریفنگ دی گئی۔
سینئر وزیر نے بتایا کہ کراچی جیسے بڑے اور پیچیدہ شہر میں ٹرانسپورٹ منصوبے چیلنجنگ ہوتے ہیں کیونکہ مختلف اداروں کی زیر زمین اور زمینی یوٹیلٹیز منصوبوں کا حصہ بنتی ہیں۔ ریڈ لائن بی آر ٹی میں یوٹیلٹیز کی منتقلی بڑا مسئلہ تھا، تاہم بیشتر تکنیکی رکاوٹیں دور کر لی گئی ہیں اور باقی امور بھی مربوط حکمتِ عملی سے حل کیے جا رہے ہیں۔
انہوں نے کہا کہ وزیرِاعلیٰ سندھ اور متعلقہ ٹیم مسلسل مانیٹرنگ کر رہی ہے، منصوبے کے دفاتر 24 گھنٹے کھلے رہتے ہیں تاکہ کام میں کوئی تاخیر نہ ہو۔ حکومت سندھ کا مقصد ہے کہ یہ منصوبہ جلد مکمل ہو کر شہریوں کو جدید سفری سہولیات فراہم کرے۔
اے ڈی بی کے وفد نے ریڈ لائن بی آر ٹی کی رفتار اور انتظامی کوششوں پر اطمینان کا اظہار کرتے ہوئے کہا کہ وہ اس منصوبے کو ایک بہترین اور ایوارڈ وننگ ماڈل کے طور پر دیکھنا چاہتے ہیں۔ وفد کے مطابق مشترکہ کوششوں سے کراچی کے شہریوں کو معیاری ٹرانسپورٹ کی سہولت فراہم کی جا سکے گی۔
