قومی کرکٹ ٹیم کے سابق کپتان محمد رضوان کا کہنا ہے کہ ٹی ٹوئنٹی ورلڈکپ میں پاکستان کی کارکردگی اچھی رہی تاہم ٹیم رن ریٹ کی بنیاد پر ایونٹ سے باہر ہوئی۔
کراچی میں پریکٹس سیشن کے دوران صحافیوں سے گفتگو کرتے ہوئے محمد رضوان نے کہا کہ سری لنکا کے خلاف میچ کو برا نہیں کہا جا سکتا کیونکہ آخر میں پاکستان نے وہ میچ جیت لیا تھا۔
انہوں نے کہا کہ کرکٹ میں اپ سیٹ ہوتے رہتے ہیں۔ مثال دیتے ہوئے انہوں نے کہا کہ زمبابوے نے بھی آسٹریلیا کو شکست دی تھی، اس لیے یہ کہنا درست نہیں کہ ایک ٹیم بڑی ہے اور دوسری چھوٹی۔
بھارت اور انگلینڈ کے درمیان سیمی فائنل میچ کے حوالے سے سوال پر محمد رضوان نے کہا کہ وہ بھارت کے میچز نہیں دیکھتے۔
کھلاڑیوں پر جرمانوں کے حوالے سے بات کرتے ہوئے انہوں نے صحافیوں سے کہا کہ بعض اوقات میڈیا کی تنقید کے باعث کھلاڑیوں پر دباؤ بڑھ جاتا ہے اور ٹیم کو اچھا یا برا دکھانے میں میڈیا کا کردار بھی اہم ہوتا ہے۔
