کوئٹہ: تحریک تحفظ آئین پاکستان کے سربراہ محمود خان اچکزئی نے کہا ہے کہ مجوزہ 28 ویں آئینی ترمیم ایک بڑی غلطی ہوگی اور اس سے آئین مزید کمزور ہو سکتا ہے۔
کوئٹہ میں پریس کانفرنس سے خطاب کرتے ہوئے انہوں نے کہا کہ ملک کو چلانے کا واحد راستہ عوام کو حقیقی حقِ حکمرانی دینا ہے۔ ان کے مطابق حکمرانوں کو یہ طے کرنا ہوگا کہ پاکستان کو آئین اور جمہوری اصولوں کے مطابق چلایا جائے۔
محمود خان اچکزئی نے دعویٰ کیا کہ 2024 کے انتخابات شفاف نہیں تھے اور انتخابی عمل پر سنجیدہ سوالات موجود ہیں۔ ان کا کہنا تھا کہ اگر سیاست میں سرمایہ اور اثرورسوخ غالب رہے گا تو عام شہری کی نمائندگی کمزور پڑ جائے گی۔
انہوں نے کہا کہ آئین اور اس کے تحت دیے گئے حلف پر عمل کیا جائے تو پاکستان دنیا کے بہترین ممالک میں شامل ہو سکتا ہے۔ ان کے مطابق آئینی بالادستی اور جمہوری روایات ہی ملکی استحکام کی ضمانت ہیں۔
محمود خان اچکزئی نے قدرتی وسائل کے حوالے سے بھی مؤقف اختیار کیا کہ جن علاقوں سے معدنیات اور وسائل نکلتے ہیں، وہاں کے لوگوں کو ان وسائل میں مناسب حصہ ملنا چاہیے۔
انہوں نے پاکستان تحریک انصاف کے بانی کی رہائی کا مطالبہ دہراتے ہوئے کہا کہ ملاقاتوں پر پابندیوں سے سیاسی کشیدگی میں اضافہ ہوتا ہے۔
علاقائی صورتحال پر گفتگو کرتے ہوئے محمود خان اچکزئی نے کہا کہ اگر ایران اور امریکا کے درمیان جنگ ہوتی ہے تو اس کے اثرات پاکستان اور افغانستان پر بھی پڑ سکتے ہیں، اس لیے خطے کے ممالک کو تعاون اور اتحاد کی راہ اپنانی چاہیے۔
