مظفرآباد: سکیورٹی اداروں نے مظفرآباد کے علاقے چہلہ میں انٹیلیجنس اطلاعات کی بنیاد پر کارروائی کرتے ہوئے پانچ مشتبہ افراد کو گرفتار کر لیا۔ کارروائی کے دوران اسلحہ، مواصلاتی آلات اور حساس نوعیت کا مواد برآمد ہونے کا دعویٰ کیا گیا ہے۔
سکیورٹی ذرائع کے مطابق گرفتار افراد کے قبضے سے لیپ ٹاپ، موبائل فونز اور دیگر ڈیجیٹل و مواصلاتی آلات برآمد ہوئے، جن کا فرانزک اور تکنیکی تجزیہ کیا جا رہا ہے۔ ابتدائی تحقیقات میں بعض مشکوک روابط اور حساس نوعیت کے مواد کی موجودگی کا انکشاف ہوا ہے، تاہم تحقیقات تاحال جاری ہیں۔
ذرائع کا کہنا ہے کہ دورانِ تفتیش ایک ملزم کی نشاندہی پر اسلحے کا بڑا ذخیرہ بھی برآمد کیا گیا۔ برآمد ہونے والے سامان میں سات خودکار ہتھیار، متعدد گرینیڈز اور دیگر جنگی نوعیت کا سازوسامان شامل ہے، جسے مزید قانونی کارروائی کے لیے تحویل میں لے لیا گیا ہے۔
سکیورٹی ذرائع کے مطابق ملزمان کے قبضے سے حساس تنصیبات اور اہم مقامات کے نقشے، دستاویزات اور دیگر ریکارڈ بھی برآمد ہوا ہے۔ برآمد شدہ مواد کی جانچ پڑتال کی جا رہی ہے تاکہ اس کے ممکنہ استعمال اور نوعیت کا تعین کیا جا سکے۔
حکام کا کہنا ہے کہ گرفتار افراد سے مزید تفتیش جاری ہے اور تحقیقات کے مختلف پہلوؤں کا جائزہ لیا جا رہا ہے۔ سکیورٹی اداروں کے مطابق کارروائی کا مقصد ممکنہ خطرات کی روک تھام اور امن و امان کی صورتحال کو برقرار رکھنا ہے۔
