افریقہ کے پانچ ممالک نے سیاحوں کو ایک مشترکہ ویزا فراہم کرنے پر اتفاق کر لیا ہے۔ اس ’یونی ویزا‘ کا مقصد خطے میں سیاحت کو فروغ دینا اور سیاحوں کی نقل و حرکت کو آسان بنانا ہے۔
براعظم افریقہ کے جنوب میں واقع انگولا، بوٹسوانا، نمیبیا، زیمبیا اور زمبابوے کے حکام نے اصولی طور پر اس خصوصی ویزے کے استعمال کو وسعت دینے پر اتفاق کر لیا، جسے یونی ویزا کہا جاتا ہے۔ اس ویزے کے تحت سیاح متعدد ممالک میں داخل ہو سکتے ہیں۔ ”کاوانگو-زمبیزی یا کازا‘‘ کہلانے والے یہ پانچ ممالک افریقہ میں ” ٹرانسفرنٹیئر کنزرویشن ایریا‘‘ بناتے ہیں۔
یونی ویزا فی الحال زیمبیا اور زمبابوے میں استعمال ہوتا ہے جبکہ اس ویزے پر بوٹسوانا میں دن کے وقت سفر کرنے کی اجازت ہے۔ تاہم اب زیمبیا میں کازا سربراہان مملکت کے سربراہی اجلاس میں شرکت کرنے والے دیگر علاقائی رہنماؤں نے بھی اس خصوصی ویزا پروگرام میں شامل ہونے پر اتفاق کر لیا ہے۔ وہ اس ویزے کے دائرہ کار کو دیگر ریاستوں کے ساتھ ساتھ جنوبی افریقی اقتصادی بلاک تک بڑھانا چاہتے ہیں۔
زیمبیا کے صدر ہاکائندے ہچلیما نے اپنے خطاب میں کہا، ”میں صرف اتنا کہنا چاہتا ہوں کہ ایسا لازمی ہو گا۔ میں شکر گزار ہوں کہ میرے ساتھی یونی ویزا پر اتفاق رائے پر پہنچ گئے ہیں۔‘‘
بوٹسوانا کے نائب صدر سلمبر سوگوانے نے کہا کہ ان کا ملک یونی ویزا کو مکمل طور پر اپنائے گا۔
کازا کے رکن ممالک نے معدومیت کے خطرے سے دوچار جنگلی حیات کے تحفظ کے لیے سرگرم بین الاقوامی ادارے ”سیٹیز‘‘ پر زور دیا کہ وہ ہاتھیوں اور ہاتھی دانت کی تجارت پر سے پابندی ہٹائے۔ 184 رکنی بین الحکومتی ادارہ ”سیٹیز‘‘ جنگلی حیات کی تجارت کو منظم کرتا ہے تاکہ بعض نسلوں کو زیادہ استحصال سے بچایا جا سکے۔
کازا ریاستوں کا کہنا ہے کہ ان کے پاس ایک بلین ڈالر مالیت کے ہاتھی دانت کے ذخیرے ہیں، جن کی فروخت سے وہ جنگلی حیات کے تحفظ کے پروگراموں کو فنڈ کرنا چاہتے ہیں۔
