پنجاب کی وزیر اعلیٰ مریم نواز نے کہا ہے کہ نئے ڈیمز اور ریزروائر بنانے سمیت جو اقدامات ضروری ہوں گے وہ کیے جائیں گے اور ایک سال کے اندر ایسے انتظامات کیے جائیں گے کہ اگر اگلے سال سیلاب آئے تو تباہی نہ ہو۔
مریم نواز نے بتایا کہ بارش کے یکے بعد دیگرے تین سے چار اسپیلز اور بھارت کی جانب سے پانی چھوڑنے کے باعث سنگین صورتحال کا سامنا کرنا پڑا، تاہم ریسکیو کی غیر معمولی تیاریوں اور ارلی وارننگ سسٹم کی بدولت بڑے نقصان سے بچاؤ ممکن ہوا۔ ان کے مطابق بروقت متاثرین کو سیلاب زدہ علاقوں سے منتقل کرنے سے ہزاروں جانیں بچائی گئیں۔
وزیر اعلیٰ نے کہا کہ یہ ان کے دورِ وزارت اعلیٰ کا پہلا سیلاب ہے اور وہ ایک سال کے اندر ایسے اقدامات کریں گی کہ آئندہ سیلاب کے خطرات کم سے کم ہوں۔ انہوں نے مزید بتایا کہ این ڈی ایم اے، پی ڈی ایم اے اور اپنی ٹیم کو آئندہ کے لیے جامع پلان مرتب کرنے کی ہدایت کر دی گئی ہے۔
