لاہور — پولیس نے غیرت کے نام پر اپنی بہن اور بہنوئی کو قتل کرنے والے ملزم کو گرفتار کر لیا۔
پولیس کے مطابق مجاہد اسکواڈ ناکا شیرا کوٹ نے کارروائی کرتے ہوئے ملزم کاشف کو گرفتار کیا، جس نے اپنے ساتھیوں کے ساتھ 6 دسمبر 2024ء کو نوبیاہتا جوڑے کو چھریوں کے وار سے قتل کیا تھا۔
ترجمان پولیس کا کہنا ہے کہ ملزم اپنے ساتھیوں سمیت کوٹ لکھپت پولیس کو قتل کے مقدمے میں مطلوب تھا اور واردات کے بعد گرفتاری سے بچنے کے لیے روپوش ہوگیا تھا۔ گرفتار ملزم کا تعلق چلاس ویلی، دیامیر سے بتایا گیا ہے۔
پولیس حکام نے مزید بتایا کہ متعلقہ پولیس کے آنے تک ملزم کاشف تھانہ شیرا کوٹ کی تحویل میں رہے گا۔
