وزیراعلیٰ پنجاب مریم نواز شریف نے اوزون کے عالمی دن کے موقع پر کہا کہ زمین کو بچوں کے لیے محفوظ بنانا حکومت کی اولین ترجیح ہے۔ انہوں نے بتایا کہ اوزون کی حفاظت انسانی زندگی، فصلوں اور نسلِ نو کے مستقبل کے لیے انتہائی اہم ہے۔
مریم نواز نے کہا کہ موسمیاتی تبدیلیوں کی وجہ سے بارشوں کے انداز بدل گئے ہیں اور پنجاب حالیہ سیلاب کی شکل میں اس کا خمیازہ بھگت رہا ہے۔ انہوں نے پنجاب کے لیے پہلی جامع ماحولیاتی پالیسی متعارف کرائی تاکہ زمین آئندہ نسلوں کے لیے محفوظ رہے۔
وزیراعلیٰ نے بتایا کہ پنجاب میں ماحول دوست الیکٹرو بسیں، شجرکاری مہم “پلانٹ فار پاکستان” اور گرین انرجی کے منصوبے متعارف کیے جا رہے ہیں تاکہ فضا صاف اور ماحول دوست منصوبے فروغ پائیں۔ انہوں نے عوام سے اپیل کی کہ وہ فضا، پانی اور زمین کو محفوظ بنانے میں اپنا کردار ادا کریں۔
