اسلام آباد: ایف بی آر نے نان فائلرز سوشل میڈیا انفلوئنسرز کے خلاف سخت کارروائی کا فیصلہ کر لیا ہے۔ ذرائع کے مطابق 30 ستمبر تک انکم ٹیکس ریٹرن جمع کرانے والوں کی فہرست تیار کی جا رہی ہے، جس کے بعد اکتوبر سے بڑے پیمانے پر ایکشن شروع ہوگا۔
ذرائع نے بتایا کہ دولت کی نمائش کرنے والے نان فائلرز انفلوئنسرز کی تفصیلات نادرا سے حاصل کی جا چکی ہیں، جن میں بینک اکاؤنٹس، اخراجات، بیرون ملک سفر، کریڈٹ اور اے ٹی ایم کارڈز کی معلومات شامل ہیں۔ ایف بی آر مانیٹرنگ کے ذریعے سوشل میڈیا پر وائرل ہونے والے سٹارز کا ڈیٹا بھی چیک کرے گا۔
ایف بی آر کا منصوبہ ہے کہ جو نان فائلرز مہنگی گاڑیوں، گھروں، کپڑوں اور جیولری کی نمائش کرتے ہیں، ان کے خلاف کارروائی کی جائے۔ ذرائع کے مطابق ٹیکس نیٹ میں نہ آنے والے شوبز اور سوشل میڈیا سے تعلق رکھنے والے بااثر افراد پر کڑی نظر رکھی جا رہی ہے تاکہ قومی خزانے میں ٹیکس وصولی کو یقینی بنایا جا سکے۔
