سیکیورٹی فورسز نے ڈیرہ اسماعیل خان کے علاقے کلاچی میں کارروائی کرتے ہوئے 7 خوارج کو ہلاک کر دیا جن میں تین افغان اور دو خودکش بمبار بھی شامل ہیں۔ آئی ایس پی آر کے مطابق یہ آپریشن 20 ستمبر کو ان معلومات کی بنیاد پر کیا گیا کہ علاقہ میں بھارت نواز پراکسی دہشت گرد عناصر متحرک ہیں۔
آئی ایس پی آر نے بتایا کہ سینیٹائزیشن آپریشن جاری ہے تاکہ علاقے میں موجود کسی بھی دوسرے ہندوستانی اسپانسر شدہ خارجی کو ختم کیا جا سکے۔ ادارے نے توقع ظاہر کی کہ افغان حکومت اپنی ذمہ داریاں نبھاتے ہوئے اپنی سرزمین کو پاکستان کے خلاف دہشت گردانہ سرگرمیوں کے لیے استعمال ہونے سے روکے گی۔
وفاقی وزیر داخلہ محسن نقوی نے کارروائی کو سیکیورٹی فورسز کی پیشہ ورانہ صلاحیتوں کی مثال قرار دیتے ہوئے عملے کو خراجِ تحسین پیش کیا اور کہا کہ قوم سیکیورٹی فورسز کے ساتھ کھڑی ہے۔ ان کا کہنا تھا کہ خوارجی کہیں بھی چھپنے کی جگہ نہیں پائیں گے اور وطن سے بھارتی حمایت یافتہ دہشت گردی کا خاتمہ یقینی بنایا جائے گا۔
