وفاقی وزیر منصوبہ بندی احسن اقبال نے کہا ہے کہ پاک چین دوستی اب جینومکس تعاون کے ساتھ انسانی جینوم جتنی بامعنی ہوگئی ہے۔ انہوں نے یہ بات گوانگ ژو میں بیجنگ جینومکس انسٹی ٹیوٹ (بی جی آئی) کے ہیڈکوارٹر کے دورے کے موقع پر کہی۔
اس موقع پر انسٹی ٹیوٹ کی جانب سے پاکستانی ماہرین کے لیے 500 تربیتی اسکالرشپس دینے کا اعلان بھی کیا گیا۔ وفاقی وزیر نے اس اقدام کو دونوں ممالک کے تعلقات میں ایک اہم سنگِ میل قرار دیا۔
احسن اقبال کا کہنا تھا کہ جینومکس میں تعاون نہ صرف بیماریوں کے علاج کے لیے اہم ہے بلکہ یہ صحت، غذائی تحفظ اور علم پر مبنی معیشت کے فروغ میں بھی بنیادی کردار ادا کرے گا۔
انہوں نے مزید کہا کہ سی پیک 2.0 اب صرف انفراسٹرکچر منصوبوں تک محدود نہیں رہا بلکہ یہ نسلوں کی صحت اور خوشحالی کے لیے ایک روشن مستقبل کی ضمانت بنتا جا رہا ہے۔
