سینیٹ کی قائمہ کمیٹی برائے دفاع کے اجلاس میں سینیٹر محمد طلحہ محمود کو متفقہ طور پر چیئرمین منتخب کر لیا گیا۔ تجویز سینیٹر عمر فاروق نے دی جس کی تائید سینیٹر سرمد علی نے کی۔
ذمہ داری سنبھالتے ہوئے طلحہ محمود نے کہا کہ دفاعی کمیٹی ایوانِ بالا کی سب سے اہم کمیٹی ہے، افواجِ پاکستان کی قربانیاں باعث فخر ہیں اور قومی سلامتی ہر چیز پر مقدم ہے۔ انہوں نے کہا کہ فوج کا ساتھ دینا قومی مفاد کا تقاضا ہے اور تمام اداروں کے ساتھ تعاون جاری رکھا جائے گا۔
انہوں نے سعودی عرب کے ساتھ حالیہ دفاعی معاہدے کو پاکستان کے لیے اہم قرار دیتے ہوئے کہا کہ اس پر پارلیمنٹ کو اعتماد میں لینا چاہیے۔ طلحہ محمود نے وزارتِ دفاع سے منسلک اداروں میں بہتری اور اصلاحات کے عزم کا بھی اظہار کیا۔
