لاہور سمیت پنجاب کے مختلف شہروں میں بارش کا سلسلہ جاری ہے جبکہ کراچی میں بھی بادل برس پڑے۔
صوبائی دارالحکومت لاہور میں مال روڈ، ایبٹ روڈ، گڑھی شاہو، ریلوے اسٹیشن، لکشمی چوک، ڈیوس روڈ، کینال روڈ، جیل روڈ، ماڈل ٹاؤن، جوہر ٹاؤن اور دیگر علاقوں میں بارش کے بعد موسم خوشگوار ہوگیا اور ٹھنڈی ہوائیں چلنے لگیں۔
پنجاب کے دیگر شہروں ملتان، فیصل آباد، خانیوال، وہاڑی، پیر محل، بہاولپور اور دنیا پور میں بارش ہوئی، جبکہ ساہیوال، پاکپتن اور میاں چنوں میں بھی بادلوں کی گرج برس رہی ہے۔ بارش کے باعث نشیبی علاقوں میں پانی جمع ہوگیا اور کئی علاقوں میں فیڈرز ٹرپ ہونے سے بجلی کی فراہمی معطل ہوگئی۔
ادھر شہرِ قائد میں بھی رات گئے کہیں تیز اور کہیں ہلکی بارش ہوئی۔ اورنگی ٹاؤن، نیو کراچی، منگھوپیر، بلدیہ اور سرجانی میں بادل برس پڑے، جبکہ ناظم آباد، نارتھ ناظم آباد اور بفر زون میں ہلکی بارش ریکارڈ کی گئی۔ گلشن اقبال، گلستان جوہر اور اطراف کے علاقوں میں بوندا باندی بھی ہوئی۔ بارش کے نتیجے میں شہر کے کئی علاقوں میں فیڈرز ٹرپ کرگئے جس سے بجلی کی فراہمی متاثر ہوئی اور شہریوں کو مشکلات کا سامنا کرنا پڑا۔
خیبرپختونخوا اور آزاد کشمیر کے مختلف شہروں میں بھی موسلا دھار بارش کے بعد موسم خوشگوار ہوگیا۔ محکمہ موسمیات نے آئندہ دنوں میں مزید بارشوں کی پیش گوئی کی ہے۔
