روم : اطالوی پولیس نے شہر پارما میں معروف ہسپانوی مصور سیلواڈور ڈالی کی نمائش پر چھاپہ مار کر 21 فن پارے ضبط کر لیے ہیں، جنہیں جعلی ہونے کے شبے میں حراست میں لیا گیا ہے۔
پولیس کے مطابق ضبط کیے گئے فن پاروں میں ڈرائنگز، ٹیپسٹریز، اور انگریونگز شامل ہیں۔ شبہ اس وقت پیدا ہوا جب کیرابینیری آرٹ اسکواڈ کے افسران نے جنوری میں معمول کی جانچ پڑتال کے دوران فن پاروں کے معیار اور اصلیت پر سوال اٹھایا۔
سینئر افسر ڈیئگو پوگلیو نے بتایا کہ نمائش میں صرف لیتھوگراف، پوسٹرز، ڈرائنگز اور چند مجسمے شامل تھے، لیکن کوئی بڑی یا مشہور پینٹنگ موجود نہیں تھی، جس سے شکوک مزید بڑھ گئے۔
ان کا کہنا تھا کہ “یہ سمجھنا مشکل تھا کہ کوئی اتنے غیر اہم فن پاروں کے لیے مکمل نمائش کیوں منعقد کرے گا۔”
فن پاروں کی تصدیق کرنے والے ماہر مارک ونٹر کے مطابق 1970 کی دہائی کے وسط سے ڈالی کے جعلی لیتھوگرافس کی ایک بڑی تعداد دنیا بھر میں گردش کر رہی ہے، اور یہی مسئلہ اب بھی آرٹ مارکیٹ کے لیے چیلنج بنا ہوا ہے۔
اطالوی حکام نے ضبط شدہ فن پاروں کو فرانزک ماہرین کے حوالے کر دیا ہے تاکہ ان کی اصلیت کی حتمی جانچ کی جا سکے۔
