ایتھوپیا کے مشرقی علاقے میں ایک مسافر ٹرین حادثے کا شکار ہو گئی، جس کے نتیجے میں کم از کم 14 افراد ہلاک اور 29 زخمی ہو گئے۔
سرکاری ذرائع ابلاغ کے مطابق حادثہ رات دو بجے کے قریب اُس وقت پیش آیا جب مسافر ٹرین جبوتی کی سرحد کے قریب واقع قصبے دیویل سے ڈائرے داوا کے درمیان سفر کر رہی تھی۔ یہ فاصلہ تقریباً 200 کلومیٹر (120 میل) ہے۔
مقامی نشریاتی ادارے ڈائر ٹی وی نے اپنی فیس بک پوسٹ میں بتایا کہ “ڈائرے داوا-دیویل لائن پر پیش آنے والے حادثے میں 14 افراد ہلاک اور 29 دیگر شدید اور معمولی زخمی ہوئے ہیں۔”
حادثے کے بعد جاری کی گئی تصاویر میں دیکھا جا سکتا ہے کہ کئی بوگیاں الٹ گئی ہیں جبکہ بعض بری طرح تباہ ہو چکی ہیں۔ امدادی ٹیموں نے موقع پر پہنچ کر زخمیوں کو قریبی اسپتال منتقل کیا۔
ایتھوپیا میں ریل حادثات شاذ و نادر ہی پیش آتے ہیں۔ یہ ملک افریقہ کا دوسرا سب سے زیادہ آبادی والا ملک ہے، جہاں تقریباً 13 کروڑ افراد آباد ہیں۔
خیال رہے کہ 1985 میں جبوتی سے ایتھوپیا کے دارالحکومت ادیس ابابا جانے والی ایک ٹرین ایک کھائی میں جا گری تھی، جس میں 400 سے زائد افراد ہلاک اور 500 زخمی ہوئے تھے — جو ملک کی تاریخ کا بدترین ریلوے حادثہ قرار دیا جاتا ہے۔
