نیوزی لینڈ میں ایک 13 سالہ لڑکے نے آن لائن خریدے ہوئے تقریباً 100 ہائی پاور مقناطیس نگل لیے، جس کے نتیجے میں اسے شدید طبی مشکلات کا سامنا کرنا پڑا۔ چار دن تک پیٹ میں درد کے بعد لڑکے کو نارتھ آئی لینڈ کے تورنگا ہسپتال منتقل کیا گیا، جہاں ڈاکٹروں نے بتایا کہ مقناطیس کی وجہ سے اس کی چھوٹی اور بڑی آنت کے چار حصوں میں ٹشوز مردہ ہو گئے تھے، جنہیں ہٹانے کے لیے آپریشن کرنا پڑا۔
ایکسرے سے ظاہر ہوا کہ مقناطیس آنتوں کے اندر چار سیدھی لائنوں میں اکٹھے ہو گئے تھے، کیونکہ مقناطیسی قوت کی وجہ سے وہ الگ الگ حصوں میں چپک گئے تھے۔ لڑکے نے ان مقناطیسوں کو تقریباً ایک ہفتہ قبل آن لائن خریدا تھا، حالانکہ نیوزی لینڈ میں جنوری 2013 سے ایسے ہائی پاور مقناطیس بیچنے پر پابندی ہے۔
آن لائن شاپنگ پلیٹ فارم نے کہا ہے کہ وہ حفاظتی تقاضوں کی تعمیل کو یقینی بنانے کے لیے تحقیقات شروع کر رہا ہے۔ میڈیکل جرنل کے مصنفین بنورا لیکاملاج، لوسندا ڈنکن-ویرے اور نکولا ڈیوس نے اس کیس کو نہ صرف مقناطیس نگلنے کے خطرات بلکہ کم عمر افراد کے لیے آن لائن خریداری کے ممکنہ خطرات کی نشاندہی قرار دیا۔ انہوں نے کہا کہ آپریشن کے بعد بھی مستقبل میں مریض کو آنتوں میں رکاوٹ، پیٹ کا ہرنیا اور دائمی درد جیسی پیچیدگیوں کا سامنا ہو سکتا ہے۔
