لاہور: پنجاب حکومت نے پہلی مرتبہ صوبے کی 65 ہزار مساجد کے امام کے لیے وظیفہ مقرر کرنے کا فیصلہ کیا ہے۔ وزیراعلیٰ مریم نواز شریف نے کہا کہ امام مسجد معاشرے کا قابل احترام فرد ہے اور محلے میں چندہ جمع کر کے انہیں ادائیگی غیر مناسب ہے، اس لیے حکومت پنجاب امام مسجد کی معاشی معاونت کرے گی۔
وزیراعلیٰ مریم نواز شریف کی زیر صدارت امن و امان کے سلسلے میں پانچویں اجلاس میں مساجد کی تعمیر و مرمت کے پروجیکٹس سالانہ ترقیاتی پروگرام میں شامل کر لیے گئے۔ اجلاس میں رائے ونڈ میں اجتماع کے لیے رابطہ سڑکوں کی تعمیر و مرمت، خصوصی بسوں کی سہولت اور سیکورٹی کے فول پروف انتظامات بھی مکمل کرنے کی ہدایت دی گئی۔
اجلاس میں یہ بھی فیصلہ کیا گیا کہ پنجاب میں سائبر کرائم سیل تشکیل دیا جائے گا اور لاؤڈ اسپیکر کے غیر قانونی استعمال پر کارروائی یقینی بنائی جائے گی۔ اجلاس کے دوران بریفنگ دی گئی کہ پنجاب کی تمام مساجد میں نماز جمعہ اور دیگر نمازیں باجماعت ادا کی جا رہی ہیں اور مسجد کا تقدس برقرار رکھنا ہر مسلمان پر فرض ہے۔
واضح رہے کہ سال 18-2017 میں خیبر پختونخوا حکومت نے صوبے کی مساجد کے امام کے لیے ماہانہ 10 ہزار روپے وظیفہ مقرر کرنے کا اعلان کیا تھا۔
