فرانس میں سیکیورٹی اداروں نے ایک 20 سالہ افغان شہری کو گرفتار کر لیا ہے جس پر الزام ہے کہ اس کا تعلق داعش خراسان سے ہے۔ فرانسیسی انسدادِ دہشت گردی پراسیکیوشن کے مطابق ملزم پر دہشت گرد تنظیم میں شمولیت اور دہشت گردی کی مالی معاونت کے الزامات عائد کیے گئے ہیں۔
ملزم کو گزشتہ ہفتے لیون شہر سے گرفتار کیا گیا تھا اور عدالت نے اسے ریمانڈ پر جیل بھیج دیا ہے۔ تحقیقات میں انکشاف ہوا ہے کہ وہ جہادی نظریات رکھتا ہے اور داعش خراسان سے مسلسل رابطے میں تھا۔
حکام کے مطابق وہ تنظیم کی مالی امداد کے ساتھ ساتھ داعش کی پروپیگنڈا ویڈیوز کا ترجمہ اور سوشل میڈیا پر تشہیر بھی کرتا تھا۔
فرانسیسی اخبار لی پاریزین کے مطابق ملزم کئی سال قبل افغانستان سے فرانس آیا تھا اور گرفتاری کے وقت لیون کے ایک حراستی مرکز میں موجود تھا۔
اس پر پہلے بھی شدت پسندانہ مواد پوسٹ کرنے اور دہشت گردی کی تعریف کرنے کے الزامات کے تحت تحقیقات جاری تھیں۔
یاد رہے کہ داعش خراسان افغانستان، پاکستان اور وسطی ایشیا کے کچھ حصوں میں سرگرم ہے اور مارچ 2024 میں ماسکو کنسرٹ ہال حملے سمیت متعدد خونریز کارروائیوں کی ذمہ داری قبول کر چکی ہے۔
