اٹلی کے شمالی پہاڑی سلسلے میں برفانی تودہ گرنے سے جرمن کوہ پیماؤں کے دو گروپ حادثے کا شکار ہو گئے جس کے نتیجے میں 5 افراد ہلاک ہو گئے۔ تین کوہ پیما 3,200 سے 3,500 میٹر کی بلندی پر چڑھائی کے دوران تودے کی زد میں آکر گہری کھائی میں جا گرے اور موقع پر جان کی بازی ہار گئے۔ بعد ازاں ایک والد اور اس کی 17 سالہ بیٹی بھی تقریباً 200 میٹر نیچے گرنے سے ہلاک پائے گئے۔
ریسکیو ٹیموں کی کارروائیاں خراب موسم اور دشوار گزار علاقے کی وجہ سے سست رہیں، تاہم دو کوہ پیماؤں کو زندہ بچا کر اسپتال منتقل کر دیا گیا جہاں وہ خطرے سے باہر ہیں۔ تازہ برف باری، ناہموار سطح اور غیر موزوں موسم حادثے کی بڑی وجوہات بتائی گئی ہیں۔ اعداد و شمار کے مطابق اٹلی سمیت مختلف ممالک میں ہر سال اوسطاً 20 سے 22 برفانی تودوں سے اموات ہوتی ہیں۔
