اسلام آباد(حفیظ درویش) کیپیٹل ڈیولپمنٹ اتھارٹی (سی ڈی اے) نے مختلف شعبوں سے تعلق رکھنے والے درجنوں افسران کو فوری طور پر ہیومن ریسورس ڈیولپمنٹ (ایچ آر ڈی) ڈائریکٹوریٹ میں رپورٹ کرنے کا حکم دیا ہے۔ یہ اقدام مبینہ بدعنوانی، نااہلی اور اختیارات کے غلط استعمال کی بڑھتی ہوئی شکایات کے بعد سامنے آیا ہے۔
چھ نومبر 2025ء کو ایچ آر ڈی ڈائریکٹوریٹ کی جانب سے جاری ہونے والے دو نوٹیفکیشنز — جنہیں چیئرمین سی ڈی اے کی منظوری حاصل ہے — کے مطابق، یہ احکامات سینئر اور مڈل لیول افسران پر لاگو ہوں گے جن کا تعلق پانی کی فراہمی، انفورسمنٹ، ماحولیات، قانون، انجینئرنگ، پلاننگ اور دیگر شعبوں سے ہے۔
نوٹیفکیشنز کے تحت درجنوں افسران کے نام شامل کیے گئے ہیں جنہیں “مزید احکامات تک فوری طور پر ایچ آر ڈی رپورٹ کرنے” کی ہدایت کی گئی ہے۔
متاثرہ افسران میں سردار خان زمیری، ڈائریکٹر واٹر ڈسٹری بیوشن، عبدالحکیم بُریرو، ڈائریکٹر لاء، ممتاز علی شر، ڈائریکٹر ٹریننگ اکیڈمی، افتخار علی حیدری، ڈائریکٹر (انفورسمنٹ کیڈر)، محمد کاشف شاہ، ڈپٹی ڈی جی (ایڈمن/ایچ آر) ایم سی آئی، اور ظفر اقبال، ایڈیشنل ڈائریکٹر (ماحولیات و ڈیزاسٹر مینجمنٹ) شامل ہیں۔
اسی روز جاری ہونے والی دوسری فہرست میں پٹواریوں، جونیئر اسسٹنٹس، سب انجینئرز، گارڈز اور دیگر عملے کو بھی مختلف شعبوں جیسے ڈی سی آفس، پارکس، پلاننگ اور انفورسمنٹ ونگ سے ہٹا کر ایچ آر ڈی رپورٹ کرنے کا حکم دیا گیا۔
ذرائع کے مطابق، یہ بڑا اقدام اندرونی تحقیقات اور شکایات کے بعد کیا گیا ہے جن میں متعدد افسران پر انتظامی ناکامی، سرکاری وسائل کے غلط استعمال اور منصوبوں کی بروقت تکمیل میں غفلت کے الزامات سامنے آئے۔ بعض افسران کے خلاف مبینہ بدعنوانی، ٹھیکوں میں بے ضابطگیوں اور تجاوزات کے معاملات کی بھی تحقیقات جاری ہیں۔
ایک سینئر سی ڈی اے افسر نے روزنامہ طلوع سے گفتگو کرتے ہوئے کہا کہ بعض افسران طویل عرصے سے ایک ہی عہدے پر تعینات تھے جس سے ادارے میں “انتظامی جمود اور احتساب کی کمی” پیدا ہو گئی تھی۔
ایک افسر نے نام ظاہر نہ کرنے کی شرط پر بتایا۔ “ایچ آر ڈی ڈائریکٹوریٹ نے نظم و ضبط کی بحالی، شفافیت اور بہتر سروس ڈیلیوری کے لیے یہ اقدام کیا ہے،”
نوٹیفکیشنز میں واضح کیا گیا ہے کہ تمام افسران اپنی چارج ری لینکوئشمنٹ اور اسیمپشن رپورٹس ایچ آر ڈی ڈائریکٹوریٹ میں جمع کرائیں۔
ذرائع کا کہنا ہے کہ یہ قدم چیئرمین سی ڈی اے کی ہدایت پر جاری کردہ ایک وسیع انتظامی صفائی مہم کا حصہ ہے جس کا مقصد اسلام آباد کی شہری انتظامیہ، منصوبہ بندی اور ماحولیات کے نظام میں بہتری لانا ہے۔
ذرائع کے مطابق، رپورٹ کرنے والے افسران کا آئندہ تبادلہ یا ان کے خلاف محکمانہ کارروائی کا فیصلہ، ایچ آر ڈی کی تحقیقات مکمل ہونے کے بعد ہوگا۔
کیپیٹل ڈیولپمنٹ اتھارٹی ماضی میں بھی کارکردگی، شفافیت اور تجاوزات کے معاملات پر تنقید کی زد میں رہی ہے، تاہم تازہ اقدامات کو ادارے میں احتساب اور شفافیت کی جانب ایک مثبت پیش رفت قرار دیا جا رہا ہے۔
