ریاض: پاکستان اور سعودی عرب کی وزارتِ انصاف کے درمیان عدالتی ترتیب، قانونی اصلاحات اور تکنیکی ترقی میں تعاون بڑھانے کے لیے ایک اہم مفاہمت کی یادداشت (ایم او یو) پر دستخط کیے گئے ہیں۔
وفاقی وزیرِ قانون، اعظم نذیر تارڑ نے سعودی عرب کے دارالحکومت ریاض میں ہونے والی دوسری بین الاقوامی کانفرنس برائے انصاف میں پاکستانی وفد کی قیادت کی۔ کانفرنس کا انعقاد سعودی ولی عہد شہزادہ محمد بن سلمان کی سرپرستی میں کیا گیا، جس میں دنیا کے 40 سے زائد ممالک کے وزراء اور قانونی ماہرین نے شرکت کی۔
اس کانفرنس میں عدالتی معیار، ڈیجیٹل تبدیلی اور انصاف کے شعبے میں عالمی سطح پر تعاون بڑھانے پر تفصیل سے غور کیا گیا۔ سینیٹر اعظم نذیر تارڑ نے کانفرنس کے دوران دو طرفہ ملاقاتوں کا ایک سلسلہ بھی منعقد کیا۔
پاکستان اور سعودی عرب کے درمیان دستخط کی جانے والی مفاہمت کی یادداشت (ایم او یو) دونوں ممالک کی وزارتِ انصاف کے درمیان عدالتی تربیت، قانونی اصلاحات اور تکنیکی ترقی میں تعاون بڑھانے کے لیے ایک تاریخی قدم ثابت ہو گا۔ اس مفاہمت کے ذریعے دونوں ملک عدلیہ کے معیار کو بہتر بنانے اور انصاف کی فراہمی کے عمل میں جدت لانے کے لیے مشترکہ کوششیں کریں گے۔
اس موقع پر وفاقی وزیر قانون، اعظم نذیر تارڑ نے کہا کہ اس شراکت داری سے نہ صرف پاکستان اور سعودی عرب کے عدالتی نظام میں بہتری آئے گی بلکہ عالمی سطح پر انصاف کے معیار میں بھی بہتری آئے گی۔
