معاونِ خصوصی برائے اطلاعات خیبرپختونخوا شفیع جان نے کہا ہے کہ بانی پی ٹی آئی عمران خان کے سوشل میڈیا اکاؤنٹس مکمل طور پر ہم ہی چلا رہے ہیں۔
انہوں نے گفتگو کرتے ہوئے کہا کہ آج بانی پی ٹی آئی کے اہلِ خانہ کو عدالت میں جانے کی اجازت نہیں دی گئی۔ شفیع جان کا کہنا تھا کہ ہم سیاسی مذاکرات پر یقین رکھتے ہیں، لیکن موجودہ حالات میں بات چیت ممکن نہیں۔
ان کا کہنا تھا کہ ہم کسی سے بات نہیں کرنا چاہتے اور یہ بھی واضح نہیں کہ آخر کس بات پر معافی مانگی جائے۔
شفیع جان نے کہا کہ حکومت میں شامل جماعتیں اس معاملے میں خود فریق ہیں، اس لیے انہیں کسی کانفرنس میں مدعو نہیں کیا جانا چاہیے۔
انہوں نے مزید کہا کہ عطا تارڑ کا مینڈیٹ کیا ہے کہ ہم ان سے بات کریں، وہ صرف 17 نشستوں پر آئے ہیں۔
