پاک فضائیہ نے ملکی دفاع کو مزید مضبوط بنانے کی جانب ایک اور اہم پیش رفت کرتے ہوئے مقامی طور پر تیار کیے گئے تیمور ویپن سسٹم کا کامیاب تجربہ کر لیا ہے۔ اس جدید ایئر لانچڈ کروز میزائل کی رینج 600 کلومیٹر تک ہے اور یہ دشمن کے زمینی اور بحری اہداف کو نہایت درستگی سے نشانہ بنانے کی صلاحیت رکھتا ہے۔
یہ میزائل جدید نیویگیشن اور گائیڈنس سسٹم سے لیس ہے اور انتہائی کم بلندی پر پرواز کر سکتا ہے، جس کی وجہ سے یہ دشمن کے فضائی دفاعی نظام سے بچ نکلنے کی بھرپور صلاحیت رکھتا ہے۔ تیمور ویپن سسٹم کی شمولیت سے پاک فضائیہ کی روایتی دفاعی طاقت اور عملی صلاحیت میں نمایاں اضافہ ہوا ہے۔
اس کامیاب تجربے سے پاکستان کی دفاعی صنعت میں تکنیکی ترقی، جدت اور خود انحصاری واضح ہوتی ہے۔ تجربے کے موقع پر مسلح افواج کے سینئر افسران، سائنس دان اور انجینئرز موجود تھے جنہوں نے اس منصوبے کی کامیابی میں اہم کردار ادا کیا۔
پاک فضائیہ کے سربراہ ایئر چیف مارشل ظہیر احمد بابر سدھو نے اس کامیابی پر سائنس دانوں، انجینئرز اور فضائیہ کی پوری ٹیم کو مبارکباد دیتے ہوئے کہا کہ یہ کامیابی قومی دفاع کو مضبوط بنانے اور ٹیکنالوجی میں خود کفالت کے عزم کی عکاس ہے۔ انہوں نے کہا کہ تیمور ویپن سسٹم کا کامیاب تجربہ پاک فضائیہ کی پیشہ ورانہ مہارت اور قومی سلامتی کے اہداف کے حصول کی واضح مثال ہے۔
