لاہور میں مادری زبان کے عالمی دن کے موقع پر پیغام دیتے ہوئے وزیراعلیٰ پنجاب مریم نواز نے کہا ہے کہ مادری زبان کی حفاظت اور فروغ کے لیے ہر ممکن کردار ادا کریں گے۔
انہوں نے کہا کہ زبان نہ صرف اظہارِ خیال کا ذریعہ ہے بلکہ اقوام کی شناخت بھی زبان سے ہی وابستہ ہوتی ہے۔ ڈیجیٹل دور میں بھی مادری زبان کی اہمیت سے انکار نہیں کیا جا سکتا، کیونکہ یہ کسی بھی قوم کی پہچان، ثقافت اور ورثے کی سب سے قیمتی علامت ہوتی ہے۔
وزیراعلیٰ پنجاب کا کہنا تھا کہ مادری زبان میں دی جانے والی تعلیم بچوں کی ذہنی نشوونما پر مثبت اثرات مرتب کرتی ہے اور قومی شناخت کے طور پر اس کی حیثیت مسلمہ ہے۔ انہوں نے کہا کہ زبان ایک سماجی عطیہ ہے جو نسل در نسل منتقل ہوتا ہے اور ثقافتی، تاریخی و سماجی روایات سے آگاہی فراہم کرتا ہے۔
مریم نواز نے بتایا کہ مادری زبانوں کے تحفظ کے لیے پنجاب انسٹی ٹیوٹ آف لینگویج آرٹ اینڈ کلچر کو مزید فعال بنایا گیا ہے۔ انہوں نے اس عزم کا اعادہ کیا کہ پنجاب حکومت مادری زبانوں کی ترقی و ترویج کے لیے عملی اقدامات جاری رکھے گی تاکہ نئی نسل اپنی ثقافت اور تاریخ سے جڑی رہے۔
