اسلام آباد: قومی اسمبلی کے حلقہ این اے 15 مانسہرہ سے نواز شریف کی شکست پر الیکشن کمیشن نے ریٹرننگ افسر کو حتمی نتیجہ جاری کرنے سے روک دیا۔چیف الیکشن کمشنرسکندر سلطان راجہ کی سربراہی میں 4رکنی بنچ نے نتائج کی مبینہ تبدیلی پر سماعت کی۔دوران سماعت وکیل نواز شریف نے کہا کہ ہمیں این اے 15مانسہرہ کے 125 پولنگ سٹیشنز کے فارم 45 نہیں ملے، کالا ڈھاکہ کا علاقہ انتہائی پسماندہ اور برفباری والا ہے۔وکیل نواز شریف نے کہا کہ پریزائیڈنگ افسران نے پولنگ ایجنٹس کو نکال دیا تھا، شفاف انتخابات کا انعقاد الیکشن کمیشن کی ذمہ داری ہے اور اس حلقے میں الیکشن شفاف نہیں ہوئے، فارم 45 کے بغیر فارم 47 جاری نہیں ہوسکتا۔
ممبر کے پی نے کہا کہ آپ کیا کہنا چاہتے ہیں کہ الیکشن شفاف نہیں ہوا؟وکیل نے کہا کہ اس حلقے کا الیکشن شفاف نہیں ہوا، انہوں نے استدعا کی کہ این اے 15مانسہرہ کا حتمی نوٹیفکیشن روکا جائے کیونکہ ریٹرننگ افسر این اے 15مانسہرہ کا جاری فارم 47 درست نہیں ہے۔دلائل مکمل ہونے پر الیکشن کمیشن نے فیصلہ محفوظ کر لیا، بعدازاں محفوظ فیصلہ سناتے ہوئے الیکشن کمیشن نے ریٹرننگ افسر کو حلقہ این اے 15 مانسہرہ کے حتمی نتیجے سے روک دیا۔الیکشن کمیشن کے باہر میڈیا سے گفتگو میں مسلم لیگ ن کے رہنما کیپٹن( ر) صفدر کا کہنا تھا کہ مانسہرہ سے نواز شریف کامیاب ہوئے اس لیے ریٹرننگ افسر کا فارم 47 درست نہیں۔کیپٹن ریٹائرڈ صفدر نے کہا کہ 45 حلقوں میں نتائج تبدیل کرنے کا دعوی کرنے والوں نے 35 پنکچر کا الزام بھی لگایا تھا، الزام سے کچھ نہیں ہوتا نتائج کی تبدیلی ثابت کریں۔واضح رہے کہ فارم 47 کے مطابق این اے 15 مانسہرہ سے نواز شریف کو شکست ہوئی تھی جبکہ آزاد امیدوار گستاسب خان کامیاب ہوئے تھے۔
علاوہ ازیں ریٹرننگ افسر کو اسلام آباد کے حلقے این 47 اور 48 کے حتمی نوٹیفکیشن سے بھی روک دیا ،تاہم ن لیگ میں شمولیت کا اعلان کرنے والے آزاد امیدوارراجہ خرم نواز کو نوٹس جاری کر دیا گیا ہے الیکشن کمیشن میں این اے47 اور 48 میں نتائج میں دھاندلی کے خلاف درخواست پرسماعت ہوئی، الیکشن کمیشن نے محفوظ فیصلہ سناتے ہوئے آر اوکو این 47 اور48 کے حتمی نوٹیفکیشن سے روک دیا۔واضح رہے کہ علی بخاری اور شعیب شاہین نے چیلنج کیا تھا۔ان کا کہنا کہ تمام فارم 45 موجود ہیں، ہمیں دھاندلی سے ہرایا گیا، 53ہزار کی لیڈ سے جیت رہے تھے، دھاندلی ہوئی۔
#/S
