وزیراعلیٰ خیبرپختونخوا علی امین گنڈا پور نے سوات میں سیلاب متاثرہ علاقوں کا دورہ کیا اور میڈیا سے گفتگو کرتے ہوئے اعلان کیا کہ متاثرہ گھروں کو دوبارہ تعمیر کیا جائے گا اور آبادیوں کو پانی کے راستوں سے ہٹا کر محفوظ مقامات پر نئی بستیاں آباد کی جائیں گی۔
انہوں نے کہا کہ سیلاب سے ہونے والے نقصانات کا 100 فیصد ازالہ کیا جائے گا اور جس کا جتنا نقصان ہوا ہے، حکومت اس کی بھرپائی کرے گی۔ ان کا کہنا تھا کہ برسوں سے لوگ قدرتی پانی کے راستوں پر گھر اور دکانیں بناتے رہے ہیں اور وقت کے ساتھ ندی نالوں کی صفائی نہ ہونے کی وجہ سے پانی نقصان دہ ثابت ہوا۔
وزیراعلیٰ نے بتایا کہ فوج بھی امدادی کارروائیوں میں تعاون کر رہی ہے اور مزید دو ہیلی کاپٹرز فراہم کیے گئے ہیں۔ انہوں نے تجاوزات کے مسئلے پر بات کرتے ہوئے کہا کہ ناجائز قبضے اور غیرقانونی تعمیرات بڑے نقصانات کا باعث بنتے ہیں اور ایسے عناصر کو سخت سزائیں دی جائیں گی۔
دوسری جانب سیدو شریف میں متاثرین نے احتجاج کرتے ہوئے روڈ بلاک کردیا اور شکوہ کیا کہ حکومتی امداد تیسرے روز بھی ان تک نہیں پہنچی۔
