امریکی صدر ڈونلڈ ٹرمپ نے کہا ہے کہ اگر نیٹو ممالک راضی ہوں تو روس پر بڑی پابندیاں لگائی جا سکتی ہیں اور نیٹو ممالک روس سے ایندھن کی خریداری بند کریں تو مزید اقدامات کیے جائیں گے۔ انہوں نے کہا کہ چین پر 50 تا 100 فیصد مشروط ٹیرف یوکرین جنگ کے خاتمے میں مددگار ہوگا، جسے جنگ کے خاتمے کے بعد معطل کیا جائے گا۔
ٹرمپ نے یوکرین جنگ کو بائیڈن اور زیلنسکی کی جنگ قرار دیتے ہوئے کہا کہ وہ جنگ روکنے اور جانیں بچانے میں مدد کر رہے ہیں۔ انہوں نے نیٹو سے کہا کہ اگر وہ اقدامات نہیں کرے تو امریکی وسائل ضائع ہوں گے۔
دریں اثنا، امریکا نے جی 7 اور یورپی یونین سے کہا کہ روسی تیل خریدنے والے ممالک خصوصاً بھارت اور چین پر محصولات عائد کریں تاکہ روس کی جنگی مشین کمزور ہو۔ اجلاس میں منجمد روسی اثاثوں کے استعمال اور یوکرین کے دفاع کے امور پر بھی بات کی گئی۔
