وزیراعلیٰ پنجاب مریم نواز شریف کی ہدایت پر سینئر وزیر مریم اورنگ زیب نے علی پور اور سیت پور کے سیلاب متاثرہ علاقوں کا دورہ کیا۔
سینئر وزیر نے دن کے وقت سیت پور کے متاثرہ دیہات کا معائنہ کیا اور رات کو دوبارہ علی پور پہنچ کر ریلیف کیمپوں میں متاثرین سے ملاقاتیں کیں۔ انہوں نے متاثرہ خاندانوں کو یقین دلایا کہ “آپ کی بہن، بیٹی اور ماں مریم نواز نے مجھے آپ کے پاس بھیجا ہے، آپ کا نقصان پورا کیا جائے گا۔”
مریم اورنگ زیب نے کہا کہ سیلاب متاثرین کو کھانا، خشک راشن اور دیگر ضروری سامان پہنچایا جا رہا ہے جبکہ ٹینٹس بھی فراہم کیے جا رہے ہیں۔ ان کا کہنا تھا کہ علی پور مکمل طور پر زیرِ آب ہے، نقصان بہت زیادہ ہے اور اس کا تخمینہ لگانے کا عمل شروع کر دیا گیا ہے۔
سینئر وزیر نے مزید بتایا کہ وزیراعلیٰ مریم نواز نے ضلعی انتظامیہ کو ہدایت دی ہے کہ ہر متاثرہ فرد کے نقصان کا تفصیلی تعین کیا جائے تاکہ بروقت معاوضہ اور امداد ممکن بنائی جا سکے۔
