اسلام آباد میں نائب وزیراعظم اور وزیر خارجہ محمد اسحاق ڈار سے پاکستان میں چین کے سفیر جیانگ زائیڈونگ نے ملاقات کی۔
ملاقات کے دوران دونوں فریقین نے خطے کی مجموعی صورتحال، بدلتی ہوئی علاقائی پیش رفت اور عالمی حالات پر تفصیلی تبادلہ خیال کیا۔
اسحاق ڈار نے مشرقِ وسطیٰ اور خطے میں کشیدگی کم کرنے کے لیے مذاکرات اور سفارتکاری پر زور دیا اور چین کے ساتھ تعاون پر مبنی سدا بہار سٹریٹجک شراکت داری کو دوہرایا۔
انہوں نے کہا کہ پاکستان خطے اور عالمی سطح پر امن و استحکام کے قیام کے لیے پختہ عزم رکھتا ہے۔ ملاقات میں سیکورٹی، اقتصادی روابط اور دوطرفہ تعاون کے فروغ پر بھی بات چیت ہوئی۔
دونوں فریقین نے مستقبل میں قریبی رابطے اور مشاورت جاری رکھنے پر اتفاق کیا، اور اس ملاقات کا مقصد باہمی دلچسپی کے امور اور علاقائی استحکام پر توجہ مرکوز کرنا تھا۔
