اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے مون سون کے مزید تین شدید سپیل کی پیش گوئی کی ہے، جس سے بارش کی شدت گزشتہ دور کے مقابلے میں 50 فیصد زیادہ ہوگی۔ لاہور، اسلام آباد، راولپنڈی اور گوجرانوالہ میں اربن فلڈنگ کے امکانات بڑھ گئے ہیں۔
چیئرمین این ڈی ایم اے لیفٹیننٹ جنرل انعام حیدر کے مطابق بونیر، باجوڑ اور بٹگرام میں طوفانی بارشوں سے 313 افراد جاں بحق ہو چکے ہیں اور متعدد زخمی ہوئے ہیں۔ گلگت بلتستان میں فلیش فلڈز اور سیاحتی حادثات بھی رپورٹ ہوئے ہیں۔
آئندہ بارشوں کا سلسلہ
17 سے 22 اگست تک ملک کے مختلف حصوں میں مزید شدید بارشیں متوقع ہیں۔ تربیلا ڈیم میں پانی کی سطح 98 فیصد تک پہنچ چکی ہے، اور اگلے 24 سے 48 گھنٹوں میں خطرناک حد تک اضافہ ہوسکتا ہے۔
متاثرہ علاقوں میں امداد
این ڈی ایم اے اور آرمی متاثرہ علاقوں میں ریسکیو اور امدادی سرگرمیاں جاری رکھے ہوئے ہیں۔ وفاقی حکومت کی جانب سے امدادی سامان کی نئی کھیپ کل بونیر روانہ ہوگی۔
سیلابی خطرات والے علاقے
کتاریاں اور گوالمنڈی میں پانی کی سطح 15 فٹ تک پہنچ گئی، جبکہ آزاد جموں و کشمیر کے نیلم، پونچھ اور باغ، اور خیبرپختونخوا کے پشاور، چترال، دیر اور چارسدہ میں بھی شدید سیلاب کے امکانات ہیں۔
