لاہور کی انسدادِ دہشتگردی عدالت نے تحریکِ انصاف کے رہنما میاں محمود الرشید کی جناح ہاؤس حملہ کیس میں دائر کی گئی درخواستِ ضمانت مسترد کر دی۔ اس کیس کی سماعت عدالت کے جج منظر علی گل نے کی۔
دورانِ سماعت پراسیکیوشن نے مؤقف اپنایا کہ میاں محمود الرشید 9 مئی کے واقعات میں مرکزی ملزم ہیں۔ ان کے خلاف 9 مئی کے چار مختلف مقدمات میں عدالتیں پہلے ہی سزا سنا چکی ہیں اور ان فیصلوں میں ملزم کا جرم ثابت ہو چکا ہے۔
پراسیکیوشن نے مزید بتایا کہ ان مقدمات میں بغاوت اور عوام کو فسادات پر اکسانے جیسی سنگین دفعات شامل ہیں، اس لیے ملزم کو ضمانت نہیں دی جانی چاہیے۔
عدالت نے فریقین کے دلائل سننے کے بعد فیصلہ سنایا اور میاں محمود الرشید کی درخواستِ ضمانت مسترد کر دی۔
