پاکستان پیپلز پارٹی کے چیئرمین بلاول بھٹو زرداری نے سندھ حکومت کی خواتین کے لیے متعارف کردہ مفت الیکٹرک پنک اسکوٹیز اسکیم کے تحت خواتین میں اسکوٹیز کی چابیاں تقسیم کیں۔
اس موقع پر بلاول بھٹو زرداری نے کہا کہ خواتین کی شمولیت کے بغیر ملک اور معاشرے کی ترقی ممکن نہیں، اور سندھ پبلک ٹرانسپورٹ میں الیکٹرک بسوں اور خواتین کے لیے ‘پنک بس سروس’ متعارف کرانے والا پہلا صوبہ ہے۔
انہوں نے اعلان کیا کہ جلد محکمہ ٹرانسپورٹ کی جانب سے پِنک ٹیکسیز کا منصوبہ بھی شروع ہوگا، جس سے خواتین کو محفوظ سفر اور روزگار کے مواقع فراہم ہوں گے۔ بلاول نے خواتین بائیکرز کی ٹریننگ اور لائسنس کے اجرا کے عمل میں محکمہ کی معاونت کو سراہا اور پرائیوٹ سیکٹر سے پارٹنرشپ کی اپیل کی۔
اس موقع پر وزیراعلیٰ سندھ مراد علی شاہ، سینیئر وزرا اور پارٹی رہنما بھی موجود تھے۔
