فیصل آباد میں پریس کانفرنس کے دوران وزیر مملکت برائے داخلہ طلال چودھری نے کہا کہ پاکستان کی سفارتی کامیابیاں 75 سال کی بلند ترین سطح پر ہیں اور بیرون ممالک میں وزیراعظم کے لیے ریڈ کارپٹ بچھایا جا رہا ہے۔
انہوں نے دہشت گردی کو پاکستان کا بڑا مسئلہ قرار دیتے ہوئے کہا کہ دہشت گرد حملوں میں زیادہ تر افغان شامل تھے، اور فوجی افسران اور جوان ملک کی حفاظت کے لیے شہید ہو رہے ہیں۔ طلال چودھری نے پی ٹی آئی پر تنقید کرتے ہوئے کہا کہ خیبر پختونخوا میں دہشت گردی کے خاتمے کے لیے کوئی ٹھوس اقدامات نہیں کیے گئے۔
وزیر مملکت نے کہا کہ افغانستان سے بات چیت جاری ہے، لیکن مذاکرات کے نتائج پر سوالیہ نشان ہے، اور گولی کی زبان سمجھنے والوں کو گولی سے ہی جواب دیا جائے گا۔
انہوں نے سیاسی جماعتوں پر زور دیا کہ وہ سکیورٹی فورسز کے ساتھ کھڑے ہوں اور اپنی ذمہ داریوں سے نہ بھاگیں۔
