لاہور ہائی کورٹ کے جسٹس علی ضیا باجوہ نے غیر رجسٹرڈ سمز کی فروخت پر شدید برہمی کا اظہار کیا۔ عدالت نے فوری طور پر تمام غیر تصدیق شدہ سمز بند کرنے کا حکم دے دیا۔
یہ احکامات غیر رجسٹرڈ سمز فروخت کرنے کے الزام میں گرفتار ملزم کی ضمانت درخواست پر سماعت کے دوران جاری ہوئے۔ ملزم سے 773 غیر رجسٹرڈ سمز برآمد ہوئیں۔
عدالت نے ریمارکس دیے کہ جعلی موبائل اکاؤنٹس بنا کر سادہ لوح افراد سے رقم بٹوری جا رہی ہے۔ یہ معاملہ نہایت سنجیدہ ہے اور اس پر سخت کارروائی ضروری ہے۔
پی ٹی اے نے عدالت کو بتایا کہ موبائل اکاؤنٹس کے لیے شرائط سخت نہ ہونے کی وجہ سے جعلسازی آسان ہوگئی ہے۔ عدالت نے 6 اکتوبر کو ڈی جی سائبر کرائم اور پی ٹی اے کے افسران کو طلب کرلیا۔
