پاکستان تحریک انصاف خیبر پختونخوا کے صدر جنید اکبر نے وزیراعلیٰ علی امین گنڈاپور کے ترجمان فراز مغل کو عہدے سے ہٹانے کا مطالبہ کر دیا ہے۔ جنید اکبر نے یہ مطالبہ پی ٹی آئی کے مرکزی واٹس ایپ گروپ میں بھیجے گئے ایک آڈیو پیغام میں کیا، جس میں انہوں نے الزام عائد کیا کہ وزیراعلیٰ کی تشکیل کردہ ٹیم مسائل کو کم کرنے کے بجائے مزید بڑھا رہی ہے۔
انہوں نے کہا کہ سینیٹر ایمل ولی کی سکیورٹی سے متعلق ان کے ٹوئٹ پر فراز مغل نے تنقید کی، جبکہ اس سے قبل بھی وہ فیک اکاؤنٹس کے ذریعے ایسی حرکات کر چکے ہیں۔ جنید اکبر کا کہنا تھا کہ اگر وزیراعلیٰ کا ترجمان ان کے خلاف ٹوئٹ کرتا ہے تو اس کا مطلب واضح ہے کہ اسے وزیراعلیٰ کی آشیر باد حاصل ہے۔
انہوں نے مزید کہا کہ وہ پہلے ہی یہ معاملہ وزیراعلیٰ کے نوٹس میں لا چکے ہیں، اور اگر فراز مغل کو اگلے دن تک ہٹایا نہ گیا تو وہ بھرپور جواب دیں گے۔ انہوں نے یہ بھی کہا کہ اگر وہ لکھ دیں کہ “تم لوگوں کی اتنی حیثیت نہیں کہ آئی جی تمہاری سنے” تو پھر کیا ہوگا۔
آڈیو پیغام کے آخر میں جنید اکبر نے کہا کہ وہ اس واٹس ایپ گروپ کو چھوڑ رہے ہیں جہاں ایسے لوگ موجود ہیں جو پارٹی قیادت کی بے عزتی کرتے ہیں۔
