پیرس: فرانس کے وزیراعظم سیبسٹین لاکورنو نے عہدہ سنبھالنے کے صرف 26 دن بعد ہی استعفیٰ دے دیا، صدر ایمانوئل میکرون نے ان کا استعفیٰ قبول کر لیا۔
غیر ملکی خبر رساں ادارے کے مطابق سیبسٹین لاکورنو کو 10 ستمبر 2025 کو وزیراعظم نامزد کیا گیا تھا۔ وہ صدر میکرون کے قریبی ساتھی اور فرانس کے وزیرِ دفاع بھی رہ چکے ہیں۔
ان کا استعفیٰ ایک ایسے وقت پر سامنے آیا ہے جب حال ہی میں سابق وزیراعظم فرانسوا بائرو پارلیمنٹ سے اعتماد کا ووٹ حاصل کرنے میں ناکام ہو گئے تھے، جس کے نتیجے میں فرانس کی تاریخ میں تیسری مرتبہ حکومت عدم اعتماد کے ووٹ سے گر گئی۔
سیاسی ماہرین کا کہنا ہے کہ بار بار حکومت کے بدلنے سے صدر میکرون کی مقبولیت پر دباؤ بڑھ رہا ہے۔ اپوزیشن جماعتیں اس صورتحال میں فوری نئے انتخابات کے مطالبے پر زور دے رہی ہیں۔
