لاہور: چوکی ہلوکی پولیس نے محافظ ٹاؤن کے علاقے میں 18 سالہ لڑکی کے ساتھ اجتماعی زیادتی کرنے والے چار ملزمان کو تین گھنٹوں میں گرفتار کر لیا۔
ایس پی ماڈل ٹاؤن اخلاق اللہ تارڑ مقدمے کی تمام کارروائی کی خود نگرانی کر رہے تھے۔ پولیس کے مطابق ملزم محسن نے لڑکی فاطمہ کو بہانے سے محافظ ٹاؤن میں واقع ایک بلڈنگ کی چھت پر بلایا، جہاں اس نے اپنے تین ساتھیوں کے ساتھ مل کر لڑکی کو اجتماعی زیادتی کا نشانہ بنایا۔
ایس پی اخلاق اللہ تارڑ کے مطابق ملزم شفیق نے متاثرہ لڑکی کی نازیبا ویڈیو بھی بنائی اور دورانِ زیادتی اسے تشدد کا نشانہ بنایا۔ ملزمان کے خلاف تھانہ کاہنہ میں دفعہ 375 اے کے تحت مقدمہ درج کر لیا گیا ہے۔
ایس پی ماڈل ٹاؤن نے بتایا کہ گرفتار ملزمان میں محسن، شفیق، جاوید اور ذیشان شامل ہیں۔ ان کا کہنا تھا کہ ایسے گھناؤنے جرم میں ملوث عناصر کسی بھی رعایت کے مستحق نہیں۔
