پاکستان پیپلز پارٹی کے چیئرمین بلاول بھٹو زرداری نے کہا ہے کہ ہمارا مقابلہ کسی صوبے یا شہر سے نہیں بلکہ پورے ملک سے ہوتا ہے اور ہم اس دوڑ میں نمبر ون ہیں۔
ان کا کہنا تھا کہ غزہ میں بچوں، صحافیوں، ڈاکٹرز اور نرسز کی نسل کشی کی گئی۔ ہم جنگ بندی معاہدے کا خیرمقدم کرتے ہیں اور امید ہے اس پر قائم رہا جائے گا۔
بلاول بھٹو نے خدشہ ظاہر کیا کہ اسرائیل نے ماضی میں سب سے زیادہ سیز فائر توڑے ہیں، ڈر ہے کہ اس بار بھی دھوکا نہ دیا جائے۔ انہوں نے کہا کہ پوری امت مسلمہ کو اس پر نظر رکھنی چاہیے۔
انہوں نے کہا کہ خاص طور پر صدر ٹرمپ کی جانب سے وزیراعظم کو خطاب کی دعوت سب کو پسند آئی ہوگی۔
بلاول بھٹو نے بتایا کہ خیرپور اکنامک زون دنیا کے بہترین اکنامک زونز میں شمار ہوتا ہے۔ یہ منصوبہ قائم علی شاہ کے دور میں شروع ہوا اور عالمی سطح پر تسلیم کیا گیا، یہ صوبے کی نہیں ملک کی کامیابی ہے۔
انہوں نے کہا کہ بی آئی ایس پی ایسا پروگرام ہے جس کی مثال دنیا کے بڑے ممالک میں بھی نہیں ملتی۔ پی ٹی آئی نے بھی نام بدل کر اسی پروگرام کے ذریعے امداد پہنچائی۔
بلاول کا کہنا تھا کہ موسمیاتی تبدیلی کے نقصان میں ہمارا کوئی کردار نہیں۔ پی ڈی ایم حکومت کا کارنامہ ہے کہ ’لوسٹ اینڈ ڈیمج فنڈ‘ کو غریب ممالک کا حق قرار دیا گیا۔ اسی فنڈ سے سندھ میں 20 لاکھ گھر تعمیر کیے جا رہے ہیں۔
انہوں نے کہا کہ سندھ حکومت کسی سے کم نہیں، وہ دنیا کے معیار سے مقابلہ کرتی ہے۔
