اسلام آباد: ایف آئی اے امیگریشن نے اسلام آباد انٹرنیشنل ایئرپورٹ پر کارروائی کرتے ہوئے جعلی سفری دستاویزات کے ذریعے یورپ جانے کی کوشش ناکام بنا دی۔
ترجمان ایف آئی اے کے مطابق فلائٹ EY303 سے اٹلی روانہ ہونے والے دو مسافروں فیاض احمد اور نعمان علی کو آف لوڈ کر کے گرفتار کیا گیا۔ دونوں کا تعلق منڈی بہاءالدین سے بتایا گیا ہے۔
ابتدائی تفتیش میں معلوم ہوا کہ ملزمان نے امیگریشن حکام کو جعلی اٹلی ریزیڈنٹ کارڈز دکھائے، جبکہ ان کے پاسپورٹ پر پاکستانی اور اٹلی امیگریشن کی جعلی مہر بھی لگی ہوئی تھی۔
ایف آئی اے کا کہنا ہے کہ دونوں افراد نے بھاری رقم ادا کر کے مختلف ایجنٹوں سے یہ جعلی دستاویزات حاصل کیں۔ گرفتار ملزمان کو ایف آئی اے اینٹی ہیومن ٹریفکنگ سرکل اسلام آباد کے حوالے کر دیا گیا ہے اور مزید تحقیقات جاری ہیں۔
