اسلام آباد: وزارتِ مذہبی امور نے گذشتہ سال فریضۂ حج ادا کرنے والے 66 ہزار 377 حاجیوں کو 3 ارب 45 کروڑ 65 لاکھ 85 ہزار روپے واپس کرنے کا فیصلہ کیا ہے۔
ترجمان کے مطابق رقوم کی منتقلی کا عمل 31 اکتوبر تک مکمل کر لیا جائے گا۔ حج 2026ء کے لیے 40 دن کے حج کا پیکیج 11 لاکھ 50 ہزار روپے اور 25 دن کے شارٹ حج کا پیکیج 12 لاکھ روپے مقرر کیا گیا ہے۔
وفاقی وزیر مذہبی امور سردار محمد یوسف نے پریس کانفرنس میں بتایا کہ گزشتہ سال حج انتظامات کے دوران رہائش، کھانے پینے اور ٹرانسپورٹ سمیت مختلف اخراجات میں ساڑھے تین ارب روپے کی بچت کی گئی، جو حاجیوں کو واپس کی جا رہی ہے۔
وزیر کے مطابق 12 ہزار 286 حاجیوں کو 12 ہزار فی کس، 13 ہزار 939 حاجیوں کو 25 ہزار، 8 ہزار 496 حاجیوں کو 48 ہزار، 20 ہزار 302 حاجیوں کو 75 ہزار، 10 ہزار 945 حاجیوں کو 90 ہزار اور 400 حاجیوں کو ایک لاکھ 10 ہزار روپے فی کس واپس کیے جائیں گے۔
انہوں نے کہا کہ جن حاجیوں کو رقم واپس نہیں کی گئی، انہوں نے سعودی عرب میں تمام سہولیات سے مکمل استفادہ کیا تھا۔
وفاقی وزیر نے مزید کہا کہ حج 2026ء میں حاجیوں کو سفری بیگ، موبائل سم اور 300 سے 600 کالز کی سہولت دی جائے گی جبکہ تربیت کے نظام کو بھی مزید مؤثر بنایا جا رہا ہے۔
سیکرٹری مذہبی امور ڈاکٹر عطاء الرحمن نے بتایا کہ گزشتہ سال منیٰ اور عرفات میں چائے اور ٹرانسپورٹ سمیت تمام سہولیات فراہم کی گئیں، تاہم شدید بیمار افراد کو حج پر نہ جانے کا مشورہ دیا جاتا ہے۔
