وزیراعظم شہباز شریف نے انڈیپینڈنٹ گروپ اور اس کے سربراہ احسن بھون کو اسلام آباد بار کونسل اور پنجاب بار کونسل کے انتخابات میں واضح برتری پر مبارکباد پیش کی ہے اور کامیاب ہونے والے تمام وکلاء کے لیے نیک خواہشات کا اظہار کیا ہے۔
جاری بیان میں وزیراعظم نے کہا کہ وکلاء برادری جمہوریت کی مضبوطی، انصاف کی فراہمی اور شہریوں کے حقوق کے تحفظ میں بنیادی کردار ادا کرتی ہے۔ ان کے مطابق نو منتخب نمائندے دیانت داری، پیشہ ورانہ مہارت اور سماجی ذمہ داری کے ساتھ اپنا کردار ادا کرتے رہیں گے۔
وزیراعظم نے مزید کہا کہ حکومت عدلیہ اور قانون کی بالادستی کے لیے وکلاء کے ساتھ کھڑی ہے اور وکلا برادری کے مسائل کے حل کے لیے وزیر قانون اعظم نذیر تارڑ مسلسل رابطے میں ہیں۔
انہوں نے اس بات پر خوشی کا اظہار کیا کہ وکلاء نے سیاسی وابستگیوں سے بالاتر ہو کر اصولی مؤقف اپنایا اور اصولی ووٹ کا صلہ کامیابی کی صورت میں ملا۔
